Jula kjem like brått kvart år, og trass i at vi ikkje heilt likar å vere dei som er først ute med å rope at julehandelen er i gong, minnar vi om at det tek litt meir tid å produsere bilde for hand enn det gjer å selje ei ferdiglaga gåve i butikken. Først skal vi ha ein time i studio, så skal de velje ut kva de vil bestille på ein visningstime, og sist men ikkje minst skal vi produsere julegåver som om vi var reine julenisseverkstaden! Det er like utruleg kvart år, men vi kjem alltid i mål med det vi skal i tide.

Nokon av dykk har kanskje fått med seg at vi har gjort ei stor investering her på Reiakvam Foto i haust. Vi har kjøpt oss ein flunkande ny fotoprinter som mellom anna kan lage dobbeltsidige kort i fotokvalitet. Denne har stått på ønskjelista vår i mange år, og vi er kjempeglade for å endeleg ha den i hus. I år har vi difor brukt tid på å plukke ut ein ny kolleksjon julekort eksklusivt til fagkundane våre, og vi håpar de er like begeistra for den som vi er! Vi har laga oss nokre prøvar, og er strålande fornøgde med kvaliteten. I presentasjonen under kan de sjå fleire døme på ulike design og utformingar. Sjølv om vi gjerne vil vise fram dei dobbeltsidige korta våre, produserer vi sjølvsagt framleis enkle fotokort i 15×15 cm med kvit bakside, eller 10×13 bilde som skal i mappe med passepartout. I november har vi 20% rabatt på julekort frå fotografbilde, så det kan vere lurt å ta kontakt med oss om de allerede har vore hos oss i år, men ikkje har bestilt julekort. Og har de enno ikkje vore på fotografering rådar vi dykk til å bestille time snarast.

– Dagrun

 

 

 

Til toppen av sida|Del dette innlegget på Facebook|Del dette innlegget på epost|Få nye innlegg på epost

Det er alltid kjekt når eg får besøk av familiar eg har fått følgje i årevis. Familien H. er ein av desse familiane, og det har blitt mange studiobesøk opp gjennom åra. Eg innrømmer gjerne at mor i familien er ei venninne av meg, og at vi absolutt er på bølgjelengde også når det kjem til kva type bilde vi likar. Det er kjekt å få eksperimentere med litt ulike bakgrunnsfargar for å skape nye bildeuttrykk.

For ikkje lenge sidan var det tid for Sølve sitt tredje studiobesøk. Nokon kjenner han kanskje att frå babypakke-annonsa mi? Frå før av har han vore på nyfødtfotografering, halvtårsfotografering og no eittårsfotografering med søsken. Det er ei bra merrittliste for ein eitt(og-litt-til)-åring! Sjølv om eg har ein del rekvisittar i studio, er det ekstra kjekt når folk tek med eigne ting som betyr noko for dei, slik som til dømes mor sin gamle gyngehest. Den slo definitivt an, og Sølve var blid som ei sol. Til slutt skulle også storesøstrene Synne og Eiril få vere med på bilda, og med litt list og lempe fekk vi fine bilde av alle tre. Pjuh!

Takk for besøket. Velkommen att (konfirmasjon neste?)
– Dagrun

 

Til toppen av sida|Del dette innlegget på Facebook|Del dette innlegget på epost|Få nye innlegg på epost

Forsommaren er ei herleg tid då ein kan vere håplaust naiv med tanke på korleis sommaren skal bli, med illusjonar om endelause, lyse og varme sommardagar (og netter). Sjeldan vert vel sommaren heilt slik vi ser føre oss, men når eg ser på brudebilda eg har tatt i juni, juli og august, så var det kanskje ikkje så verst likevel?

Ingebjørg og Per vart vigde på nydelege Villa Åmot ein av desse første sommardagane 3. juni 2017. Den blå himmelen og vassinga i krystallklart fjellvatn kan gje inntrykk av sydenstemning, men eg må vel innrømme at bilde kan lyge noko. Stemningen var uansett upåklageleg, og ansiktsuttrykka avslører ikkje at Djupedalsvatnet var toppen 10 gradar. Brudeparet trassa frosne tær og gav alt, og det løner seg. Vi sit att med så mange fine og varierte bilde at det vart vanskeleg for meg å velje ut kva eg skulle vise fram på bloggen (for det er sjølvsagt berre eit lite utval!). Portrettbilda i Djupedalen, avslappa forlovarbilde frå stranda, bilde med den gule & kule brudebilen, fantastiske brudebilde med Store- og Lisjehesten i bakgrunnen, gruppebildene på Villa Åmot… Vi la lista høgt med tanke på alt vi skulle få tid til, men vi rakk å bli ferdige få minutt før avtalt tid. Pjuh!

Takk for at eg fekk vere med å ta del i den store dagen dykkar
– Dagrun

 

Til toppen av sida|Del dette innlegget på Facebook|Del dette innlegget på epost|Få nye innlegg på epost

Som fotograf møter eg mange nye menneske og får gleda av å bli litt kjent med desse i løpet av den korte tida vi har saman. Dette gjeld spesielt brudepara mine, sidan eg tilbringer mange timar med dei. Før bryllaupet møtast vi til ein planleggingstime, så er det sjølve fotograferinga (alt frå 1,5-6 timar) og til slutt 2 timar visningstime der brudeparet vel ut takkekort, album, forstørringar og så vidare. Marte og Andreas er to av desse menneska eg stifta bekjentskap med i fjor, og vi fann tonen umiddelbart. God kjemi med brudeparet er superviktig for då får ein dei beste bilda!

Sjølv om eg meir enn gjerne skriv lange utgreiingar om korleis eg opplever ei bryllaupsfotografering, tenkte eg det kunne vere kjekt med ein liten vri. Denne gongen har fine Marte og Andreas skrive ein liten tekst for meg i staden, og audmjukt let eg dei stå for skildringa av bryllaupsfotograferinga deira:

Bryllaupsdagen vår var heilt fantastisk! Vi hadde ei kjempefin stund i Førde kyrkje og ein minnerik fest med familie og vener. Denne store dagen var det viktig for oss å dokumentere. I tillegg til dei ”obligatoriske” bryllaupsbileta, valde vi å ha med fotograf i kyrkja.

Til dette viktige dokumenteringsoppdraget valde vi Fotograf Reiakvam. Dette er eit val vi er veldig nøgde med på alle punkt: heilt frå planleggingstimen med Dagrun nokre veker før vigsla, via sjølve fotograferinga på bryllaupsdagen, visningstimen i etterkant av bryllaupet, og til vi no har motteke alle produkta vi bestilte.

Noko vi på førehand ikkje hadde tenkt på, var korleis sjølve fotograferingsstunda etter vigsla ville vere. Vi oppdaga at dette var ei herleg stund: rett og slett eit pusterom i ein elles hektisk, men veldig kjekk dag. Dagrun var behageleg å vere rundt, og fekk oss til å slappe av så godt som det let seg gjere for eit nygift par.

For oss var det viktig å få eit naturpreg på bileta våre, men vi visste ikkje på førehand kor vi ville ta bileta. Dagrun foreslo å ta bileta ved Bekkjavatnet, og for ei fin ramme det var! Det blei akkurat den stemninga i bileta som vi hadde sett føre oss – og kanskje endå litt betre. Vi er med andre ord veldig nøgde med resultatet, og det trass i at ingen av oss vel er så utprega fotogene.

Under visningstimen vi hadde i etterkant av fotograferinga, var det satt av god tid. Vi fekk òg tilgang til bileta vi kunne velje mellom god tid i forkant. Når dei nygifte likekvel hadde prestert ein god demonstrasjon av Vinglepetter frå Fjordlandreklamen, var det godt med litt kyndig rettleiing frå ein dyktig fotograf – med litt betre blikk for detaljane.

Spenninga var stor då det etter kvart byrja å tikke inn hentemeldingar på telefonen. Takkekorta blei distribuert, nøgde slektningar fann den obligatoriske forstørringa under juletreet, og dei nygifte syntest det var stor stas å få vise fram sine eigne endå litt større forstørringar – og seinare album – til ei nyfiken forsamling. No gler vi oss til å flytte inn i nytt, gamalt hus, og få bileta opp på veggen!

– Dagrun + Marte & Andreas

.

Til toppen av sida|Del dette innlegget på Facebook|Del dette innlegget på epost|Få nye innlegg på epost
K o n t a k t i n f o